最近電視又重播懲教署既一個廣告，內容大致就係一個人食左一輪皇家飯之後，出到黎洗心革面，番到工場、屋企、朋友地方，仲廣受大家歡迎，重投社會（嘩，簡直係路加福音15章11-32節既現代香港版！）

次次我一睇到就笑到碌地。朋友問我點解。我會話佢知，十足係粵語殘片劇尾果陣，吹得太大收唔到科，就惟有安排呢個無惡不作既惡霸突然見到老婆同個蘇蝦，然後良心發現，老婆一開口勸佢改過果陣，佢已經搶住話︰「唔！我同你去自首啦！」

（簡直係感人肺腑，發人深省）

再黎到呢輪熱炒既「正生書院」事件。學我老死話齋，人地都肯山長水遠去到你梅窩度讀書啦，你仲想點？（咁都諗到）唔好搞人啦，我真係諗起十幾年前麗晶花園班人上哂身果陣個樣架。果陣我仲細個，係電視度睇見佢地惡形惡相想斬人咁既款，真係幾乎嚇到標水！

橫睇掂睇都係梅窩班朋友怕樓價跌啦。又學老死話齋，住係海棠路男童院果班仲癲啦，睇下有冇影響過果區九龍塘既樓價？個牧羊人係度放羊，你會唔會話驚俾隻羊咬親？更何況個群羊係俾人困哂係四面牆入邊？

話講多左啦，講到尾，正生書院事件呢個故事俾左一個好好既教訓我地︰

千祈唔好行差踏錯，要好好地做人。如果唔係？你出番黎從良讀書都唔會有人接納你呀，衰仔！同樣道理，你坐十年八年監之後就以為可以融入番社會？睇廣告睇到你傻左呀？有咁便宜既事？哈哈！